აზერბაიჯანის მილი-მეჯლისის დეპუტატებმა საქართველოს პრემიერ-მინისტრის, გიორგი კვირიკაშვილის ინიციატივის თაობაზე უკმაყოფილება გამოხატეს, - ამის შესახებ ინფორმაციას trend.az ავრცელებს. მათივე ინფორმაციით, სიტყვით გამოსვლისას დეპუტატმა რასიმ მუსაბეკოვმა უკმაყოფილება გამოხატა საქართველოსა და სომხეთს შორის სატრანსპორტო კორიდორის შექმნის იდეასთან დაკავშირებით.

ამასთან, მილი-მეჯლისის სპიკერმა აღნიშნა, რომ ყველაზე რთულ პერიოდში აზერბაიჯანი საქართველოს მხარში ედგა და ფიქრობს, რომ ალბათ, ვიღაცას ამ კავშირის დარღვევა სურს.

სააგენტოს ცნობით, ბაქოს პროტესტი გიორგი კვირიკაშვილის გაკეთებულ განცხადებას მოჰყვა, რომლის მიხედვითაც, ფორსმაჟორულ ვითარებაში სომხეთიდან რუსეთისკენ მიმავალმა ტვირთებმა შესაძლოა, საქართველოს ოკუპირებულ ტერიტორიებზე გაიარონ.