საპარლამენტო უმრავლესობის წევრი დიმიტრი ხუნდაძე სრულიად საქართველოს კათოლიკოს-პატრიარქს ილია მეორეს დაბადებიდან 85 წლის იუბილეს ულოცავს და აცხადებს, რომ პატრიარქის მოღვაწეობა ერთი დიდი წარმატებული ეპოქაა ქვეყნის ისტორიაში.

დეპუტატი ბოლო პერიოდში საპატრიარქოში განვითარებულ მოვლენებსაც ეხმაურება და აღნიშნავს, რომ “უწმინდესმა ისეთი მყარი საძირკველი ჩაასხა, რაც არ უნდა ეცადონ, ქართულ ეკლესიას ვეღარ დაანგრევენ“.

“უწმინდესის მოღვაწეობა საუკეთესო მაგალითია არა მხოლოდ სასულიერო პირებისთვის, არამედ საერო პირებისთვისაც. მან საკუთარი ცხოვრება მხოლოდ ერის სამსახურს მიუძღვნა. მეოცე საუკუნის მეორე ნახევრის პოლიტიკური ტვირთიც კი საკუთარ თავზე აიღო, ერი და ბერი უშეცდომოდ ატარა და ჩვენთვის ყველაზე ძვირფასი - რწმენა და ღირებულებები შეგვინარჩუნა.

მინდა მივულოცო ჩვენს პატრიარქს დაბადებიდან 85 წლის იუბილე. ჯანმრთელობა და დღეგრძელობა ვუსურვო. მისმა უწმინდესობამ ახალი ეპოქა შექმნა ჩვენი ქვეყნის უახლეს ისტორიაში და მჯერა, ეს ეპოქა არ ჩაქრება. მიუხედავად ბევრი შეტევისა ქართულ ეკლესიაზე, საძირკველი იმდენად მყარია, რომ ამ ტაძარს ვეღარაფერი დაანგრევს“, - განაცხადა დიმიტრი ხუნდაძემ.