თურქეთის პრეზიდენტმა, რეჯეფ თაიფ ერდოღანმა აშშ-ში თურქი ბანკირის მეჰმეთ ჰაკან ატილას მიმართ გამოტანილი განაჩენი გააკრიტიკა.

„თუ ასეთია ამერიკული სამართლიანობა, მაშინ დიახ, მსოფლიოს საქმე ცუდად ყოფილა. შეერთებულმა შტატებმა უნდა შეცვალოს სამართლებრივი მიდგომა. ასეთი სამართლებრივი მიდგომა არ უნდა არსებობდეს, მაშინ როცა მსოფლიოს ასწავლიან, თუ რა არის სამართლიანობა“, - განაცხადა რეჯეფ თაიფ ერდოღანმა ათათურქის სახელობის აეროპორტში, საფრანგეთში გამგზავრებამდე ჟურნალისტებისთვის მიცემულ ინტერვიუში.

განცხადება ერდოღანმა მას შემდეგ გააკეთა, რაც ოთხშაბათს, ნიუ იორკში თურქული ბანკის ყოფილ აღმასრულებელ დირექტორს გამამტყუნებელი განაჩენი გამოუტანეს. ის დამნაშავედ ცნეს შეთქმულებასა და საბანკო თაღლითობაში, თუმცა ფულის გათეთრებასთან დაკავშირებული ბრალდება მოუხსნეს.