გააგრძელებს თუ არა მკურნალობის პროცესს ავსტრიის კლინიკაში პანკისში დაჭრილი თემირლან მაჩალიკაშვილი, ამაზე პასუხს მაჩალიკაშვილების ოჯახი ამ დრომდე ელოდება. როგორც ჟურნალისტებს თემირლან მაჩალიკაშვილის მამამ, მალხაზ მაჩალიკაშვილმა განუცხადა, ამასთან, დაკავშირებით საბოლოო პასუხს ავსტრიიდან დღის განმავლობაში მიიღებენ.
მისივე ინფორმაციით, ალტერნატივის სახით, პარალელურად სხვა ქვეყნებში, სხვა კლინიკების მოძიების პროცესი მიმდინარეობს.
”ავსტრია ჩვენთვის მისაღებია, ვინაიდან ვიცით, რომ ის მედიცინის კუთხით ძლიერი ქვეყანაა.
ავსტრიიდან დღის განმავლობაში ველოდებით პასუხს. პარალელურად მიმდინარეობს სხვა კლინიკების მოძიება, რათა დარწმუნებული ვიყოთ და რეზერვად გვქონდეს სხვა კლინიკაც. რაც შეეხება დაფინანსებას, რამდენადაც მე ვიცი, ფინანსებს ჯანდაცვის სამინისტრო დაფარავს”, - განაცხადა მალხაზ მაჩალიკაშვილმა.
26 დეკემბერს პანკისში ჩატარებული სპეცოპერაციის დროს 19 წლის თემირლან მაჩალიკაშვილი თავის არეში დაიჭრა. ის ამ დრომდე წმინდა მიქაელ მთავარანგელოზის სახელობის მრავალპროფილიან კლინიკურ საავადმყოფოში მკურნალობს.