ზუგდიდის რაიონულ სასამართლოში ქრთამის აღების ფაქტზე დაკავებული მარტვილის გამგეობის თანამშრომლების წინასასამართლო პროცესი გაიმართა, სადაც მხარეების მიერ წარმოდგენილი მტკიცებულების დასაშვებობა განიხილეს.

დღევანდელ პროცესზე დაკავებულების ადვოკატებმა დააყენეს შუამდგომლობა, რომლითაც ბრალდებულების გირაოს სანაცვლოდ გათავისუფლება ან მათთვის შინაპატიმრობის შეფარდება მოითხოვეს. დაცვის მხარის განმარტებით, ბრალდებულები თავს დამნაშავედ ცნობენ, რაც აღნიშნულ საქმეში ახალი გარემოებაა.

„წინასასამართლო პროცესზე ბრალდების მხარე იმ გარემოებაზე საუბრობდა, რომ ჩვენი დაცვის ქვეშ მყოფი პირები, პატიმრობიდან გათავისუფლების შემთხვევაში, ზემოქმედებას მოახდენდნენ მოწმეებზე და ხელს შეუშლიდნენ გამოძიებას, თუმცა ეს არგუმენტები არ გვაძლევს მათი პატიმრობაში დატოვების საფუძველს. პროცესზე გამოიკვეთა ახალი გარემოებები, რაც უნდა გახდეს დაკავებულის გათავისუფლების საფუძველი. ყოფილი გამგეობის თანამშრომელი ბრალს აღიარებს. ის არ აპირებს საჯარო სამსახურში დაბრუნებას. შესაბამისად, ეჭვი, რომ კვლავ განაგრძოს დანაშაულის ჩადენა, რის გამოც თავის დროზე მას წინასწარი პატიმრობა შეუფარდეს, უკვე აღარ არსებობს", - განაცხადეს ადვოკატებმა.

მოსამართლე ნატრული აკობიამ დაცვის შუამდგომლობა არ დააკმაყოფილა და ბრალდებულები პატიმრობაში დატოვა. საქმის არსებითი განხილვა 23 იანვარს, 17:00 საათზე ჩაინიშნა.

ფინანსთა სამინისტროს საგამოძიებო სამსახურის თანამშრომლებმა ქრთამის აღების და სამსახურებრივი უფლებამოსილების ბოროტად გამოყენების ბრალდებით მარტვილის გამგეობის საფინანსო-საბიუჯეტო და ინფრასტუქტურის სამსახურის, ურბანული განვითარებისა და არქიტექტურის სამსახურების ხელმძღვანელი პირები გამგეობის შენობაში 20 ნოემბერს დააკავეს.

გამოძიება საქართველოს სს კოდექსის 332-ე და 338-ე მუხლების პირველი ნაწილებით მიმდინარეობს.