თბილისსა და პანკისში ჩატარებული სპეცოპერაციების შედეგად დაკავებული ორი პირისთვის შეფარდებული აღკვეთის ღონისძიების მიზანშეწონილობაზე თბილისის საქალაქო სასამართლო მსჯელობს. ზურაბ გორნაკაშვილისა და შოაიფ ბორზიევისთვის საქმეებზე პროკურატურამ საგამოძიებო ვადის გაგრძელება მოითხოვა, რაც სასამართლომ დააკმაყოფილა. აქედან გამომდინარე, კანონმდებლობის თანახმად დღის წესრიგში დადგა ბრალდებულების მიმართ გამოყენებული აღკვეთის ღონისძიების გადახედვის საკითხი.
როგორც "ინტერპრესნიუსს" გორნაკაშვილის ადვოკატმა ირაკლი ბენიამ განუცხადა, ის ბრალდებულის გირაოს სანაცვლოდ გათავისუფლებას მოითხოვს. რაც შეეხება მეორე ბრალდებულს, როგორც მისმა ადვოკატმა იმედა ქარქაშაძემ აღნიშნა, საქმეში არ არსებობს მტკიცებულებები, რის საფუძველზეც მისი დაცვის ქვეშ მყოფი პატიმრობაში უნდა იყოს და შესაბამისად ის ბრალდებულის აღკვეთის ღონისძიების გარეშე დატოვებას მოითხოვს.
ზურაბ გორნაკაშვილი პანკისის ხეობაში 26 დეკემბერს ჩატარებული სპეცოპერაციის შედეგად დააკავეს, ხოლო შოაიფ ბორზიევი - 22 ნოემბერს, ბერი გაბრიელ სალოსის გამზირზე.