აშშ-ის იუსტიციის დეპარტამენტის ხელმძღვანელი - როდესაც ჩვენ ქვეყანაში ვიღებთ ხალხს, უნდა შევაფასოთ რამდენად დაიცავენ კანონს და ხომ არ წარმოადგენენ ჩვენთვის საფრთხეს

აშშ-ში საიმიგრაციო სისტემა იმგვარად უნდა იყოს რეფორმირებული, რომ ქვეყანაში გადმობარგება მხოლოდ მათ შეძლონ, ვინც სახელმწიფოსთვის სასარგებლო უნარებს ფლობს, - ამის შესახებ ტელეარხ Fox News-ის ეთერში აშშ-ის იუსტიციის დეპარტამენტის ხელმძღვანელმა ჯეფ სეშნსმა განაცხადა.

„როდესაც ჩვენ ქვეყანაში ვიღებთ ხალხს, კანადის მსგავსად უნდა ვიმოქმედოთ. უნდა შევაფასოთ თუ რამდენად დაიცავენ კანონს და ხომ არ წარმოადგენენ ჩვენთვის საფრთხეს, აქვთ თუ არა განათლების საკმარისი დონე და უნარები, რაც აშშ-ში წარმატების მისაღწევად აუცილებელია“, - განაცხადა ჯეფ სეშნსმა.

მისი თქმით, სავიზო ლატარეის სისტემა არაკეთილგონიერია და აბსურდულ პოლიტიკას წარმოადგენს.

„რა არის კარგი იმაში თუ შემოვუშვებთ ვინმეს, ვინც გაუნათლებელია, არ ფლობს უნარებს, ჩვენს ქვეყანაში სირთულეების წინაშე დადგება და წარმატებას ვერ მიაღწევს?“ - აღნიშნა აშშ-ს იუსტიციის დეპარტამენტის ხელმძღვანელმა.