ოკუპირებული სამხრეთ ოსეთის დე ფაქტო საგარეო საქმეთა მინისტრი დიმიტრი მედოევი ნაურუს რესპუბლიკის პრეზიდენტის ბარონ ვაქას მიწვევით 25 იანვრიდან 1-ელ თებერვლამდე ნაურუს რესპუბლიკას „ოფიციალური ვიზიტით“ ეწვევა. ამის შესახებ დე ფაქტო საგარეო საქმეთა სამინისტროს პრესსამსახური იუწყება.
„31 იანვარს მინისტრი ნაურუს რესპუბლიკის დამოუკიდებლობის 50-ე წლისთავისადმი მიძღვნილ სადღესასწაულო ღონისძიებებში მიიღებს მონაწილეობას. ვიზიტის ფარგლებში გათვალისწინებულია დიმიტრი მედოევისა და ნაურუს რესპუბლიკის პრეზიდენტის ბარონ ვაქას შეხვედრა, რომლის დროსაც ორმხრივი თანამშრომლობისა და მისი განვითარების პერსპექტივების განხილვა იგეგმება“, - ნათქვამია განცხადებაში.
შეგახსენებთ, რომ 2009 წლის 16 დეკემბერს ნაურუს რესპუბლიკამ ოკუპირებული სამხრეთ ოსეთის „დამოუკიდებლობა აღიარა“.