საგარეო საკითხებში ევროკავშირის უმაღლესი კომისრის, ფედერიკა მოგერინის განცხადებით, დასავლეთ ბალკანეთის ქვეყნებთან მიმართებაში ევროკავშირის ახალი სტრატეგია გაერთიანებაში რეგიონის ყველა ქვეყნის გაწევრიანებას ვარაუდობს, მათ შორის, ზოგიერთი მათგანი 2025 წლისთვის, შესაძლოა, წევრი გახდეს.

„ეს არის სტრატეგიის ძირითადი სიგნალი, რომელიც ჩვენ მივიღეთ კოლეგიის სხდომაზე, ეს არის დასავლეთ ბალკანეთისთვის მკაფიო გზა. ჩვენი ექვსივე პარტნიორი დასავლეთ ბალკანეთში ბოლოს და ბოლოს გაერთიანდება ევროკავშირში“, - განაცხადა მოგერინიმ, რომელმაც ჟურნალისტებს ბრიუსელში ევროკავშირის დასავლეთ ბალკანეთთან დაკავშირებით სტრატეგია წარუდგინა.

მისი თქმით, ბოლო დროს, ბევრს საუბრობენ თარიღზე - 2025 წელზე. „გასაგებია, რომ ეს არ არის კონკრეტული მიზანი, ეს არ არის საბოლოო ვადა, ეს პერსპექტივაა და სტრატეგია მკაფიოდ უსვამს ხაზს, რომ ეს გაწევრიანების პროცესის დასრულების რეალისტური პერსპექტივაა მათთვის, ვინც ახლა მართავს მოლაპარაკებებს, ასევე მათთვის, ვინც უახლოეს ხანში დაიწყებს მოლაპარაკებებს“, - განაცხადა ფედერიკა მოგერინიმ.

თავის მხრივ, ევროკომისარმა სამეზობლო პოლიტიკისა და გაფართოების საკითხებში იოჰანეს ჰანმა აღნიშნა, რომ აღნიშნული თარიღი - 2025 სავარაუდო თარიღია. „შესაძლოა, ერთი ან სხვა კანდიდატები გაწევრიანდნენ ევროკავშირში, მაგრამ ეს ძალიან ამბიციური მიზანია. ეს შესაძლებელია, თუკი შეთანხმების ყველა პირობა შესრულდება“, - განაცხადა ევროკომისარმა.