თელავში საკრებულოს სხდომა ხმაურის ფონზე მიმდინარეობდა. ოპოზიციამ საკრებულოსა და მერიაში ხელფასების ზრდის საკითხის განხილვა გააპროტესტა.
ოპოზიციონერების თქმით, საკრებულომ კანონი დაარღვია, რადგან საჯარო დაწესებულებაში შრომის ანაზღაურების შესახებ საქართველოს კანონის თანახმად, ხელფასის ზრდის საკითხი 20 იანვრამდე უნდა განსაზღვრულიყო.
"ნაციონალური მოძრაობის" დეპუტატი, ბადურ რევაზიშვილი არ გამორიცხავს საკითხის სასამართლოში გასაჩივრებას, რადგან, მისი თქმით, ხელფასების მომატებით ვადებში დარღვევა მოხდა და მიყენებული ზიანი მოსახლეობაზე აისახება.
დღევანდელ სხდომაზე მერისა და საკრებულოს თავმჯდომარის ხელფასი 3100, პირველი მოადგილეების - 2800, მოადგილეების კი, 2500 ლარით განისაზღვრა.
საკრებულოს თავმჯდომარის არჩილ თხლაშიძის ინფორმაციით, ვადების დარღვევა მხოლოდ მცირე გადაცდომაა. მისივე თქმით, კანონის დარღვევა იქნება ის, თუ ხელფასების გაზრდის საკითხი არ დამტკიცდება.