ბატონო ლევან, მოიტყუეთ თუ არა 50 მილიონი ლარის ტენდერის გარეშე გახარჯვის შესახებ, 50 მილიონ ლართან დაკავშირებით გამარტივებული შესყიდვამოთხოვნილია, - ასე მიმართა თბილისის მერის მოადგილემ ირაკლი ხმალაძემ თბილისის საკრებულოს დღევანდელ სხდომაზე ფრაქცია „ნაციონალური მოძრაობის“ წევრ ლევან ხაბეიშვილს, რომელმაც ეს საკითხი განსახილველად დააყენა.
ირაკლი ხმალაძის თქმით, გამარტივებული შესყიდვის მოთხოვნის შემდეგ კომპანიებთან ფასთა გამოკითხვა მოხდება. „ეს ნიშნავს, რომ ერთ პირთან მოლაპარაკებით ინდივიდუალური წესით ჩვენ რომელიმე კომპანიასთან ხელშეკრულების გაფორმებას არ ვაპირებთ. ტენდერი არ გაიმართება, ეს იქნება ფასთა გამოკითხვა. რამდენიმე კვალიფიციურ კომპანიას შევეკითხებით სამუშაოების შესასრულებლად ფასს და ვისგანაც მივიღებთ უფრო დაბალ ფასს, იმ კომპანიასთან გავაფორმებთ ხელშეკრულებას“, - განაცხადა ირაკლი ხმალაძემ.
თბილისის საკრებულოს დღევანდელ სხდომაზე გუდიაშვილის მოედნის რეაბილიტაციისთვის გათვალისწინებული 50 მილიონი ლარის დახარჯვის საკითხს დისკუსია მოჰყვა. ლევან ხაბეიშვილის განცხადებით, დედაქალაქის მერია პროექტის განხორციელებას ერთ პირთან მოლაპარაკების გზით აპირებს და ტენდერი არ გამოცხადდება.