ტელეკომპანია „იბერიაში“ არსებული ვითარების შეფასებისგან არასამთავრობო სექტორის წარმომადგენლები ჯერჯერობით თავს იკავებენ

ტელეკომპანია „იბერიაში“ გუშინ, არხის ხელმძღვანელობასა და არასამთავრობო სექტორის წარმომადგენლებთან, ასევე იურისტებთან შეხვედრა გაიმართა. როგორც შეხვედრის შემდგომ ჟურნალისტებს ტელეკომპანია ”იბერიას” საინფორმაციო სამსახურის უფროსმა ვახო ხუზმიაშვილმა განუცხადა, მათ შეხვედრაზე დეტალური ინფორმაცია მიაწოდეს არასამთავრობო სექტორის წარმომადგენლებს არხის გარშემო განვითარებულ მოვლენებზე და იმ მოსალოდნელ საფრთხეებზე, რაც შეიძლება „იბერიას“ დაემუქროს. მისი თქმით, თუ კომპანიას, რომელიც „იბერიას“ ერთ-ერთი მსხვილი დამფინანსებელია, ფინანსური პრობლემები შეექმნება, არხი დიდხანს მაუწყებლობას ვეღარ შეძლებს და აქ მომუშავე ადამიანები სამსახურებს დაკარგავენ.

არასამთავრობო სექტორის წარმომადგენელთა განცხადებით კი, მნიშვნელოვანია მოხდეს საქმის დეტალური შესწავლა, რისთვისაც კომუნიკაცია ექნებათ უშუალოდ ჟურნალისტებთან. დღეს არსებული ინფორმაციით კი, მათ კონკრეტული შეფასების გაკეთება უჭირთ.