ბიბლიოთეკებში თვენახევრის განმავლობაში კვალიფიკაციის ამაღლება და ტრენინგები იგეგმება, რაც როგორც უშუალოდ თანამშრომლების, ისე მთელი საზოგადოების ინტერესში შედის, - ამის შესახებ თბილისის საკრებულოს განათლებისა და კულტურის კომისიის თავმჯდომარემ, თამარ ტალიაშვილმა ჟურნალისტებს განუცხადა.
მისი თქმით, მმართველი გუნდი მუშაობს იმისათვის, რომ ბიბლიოთეკა ყველა თაობის მკითხველისთვის უფრო ხელმისაწვდომი და უფრო საინტერესო გახდეს.
„ჩვენ უნდა გავაძლიეროთ ბიბლიოთეკა მაღალი სტანდარტის მომსახურებით, წიგნადი ფონდით და თანამედროვე რესურსებით. დღეს მსოფლიოში ბიბლიოთეკა არის ცოდნის, სამოქალაქო ჩართულობის, წიგნიერების გაძლიერების, განვითარების და ცოდნის ურთიერთგაცვლის კერა. შესაბამისად, ჩვენი მიზანი ერთმნიშვნელოვნად არის თბილისის ძლიერი ბიბლიოთეკა“, - განაცხადა ტალიაშვილმა და დასძინა, რომ ბიბლიოთეკების განვითარების გეგმა საჯარო და განხილვის საგანი იქნება.