„ენერგო-პრო ჯორჯია“ - ფოთის ცენტრალური ქუჩების ენერგომომარაგება გაუმჯობესდება

„ენერგო-პრო ჯორჯიამ“ ფოთში მაღალი ძაბვის ქვესადგურის რეაბილიტაცია განახორციელა, რითაც ფოთის ცენტრალური უბნების ენერგომომარაგება მნიშვნელოვნად გაუმჯობესდა.

როგორც „ინტერპრესნიუსს“ „ენერგო-პრო ჯორჯიადან“ აცნობეს, ქვესადგურ ფოთი 2-ის რეაბილიტაციაში კომპანიამ 500 000 ლარის ინვესტიცია განახორციელა. სარეაბილიტაციო სამუშაოების ფარგლებში, ქვესადგურ ფოთი 2-ში მაღალი ძაბვის ტრანსფორმატორი დამონტაჟდა, რის შედეგადაც 8000 აბონენტი ფოთში უფრო სტაბილურ ელექტროენერგიას მიიღებს, რაც მნიშვნელოვნად შეამცირებს ავარიული გამორთვების ალბათობას და გაზრდის ელექტროენერგიის მიწოდების ხარისხს.

ელექტროენერგიის მომარაგების საიმედოობისა და სტაბილურობის გაზრდის მიზნით, სს „ენერგო-პრო ჯორჯია“ განაგრძობს ქსელის სარეაბილიტაციო სამუშაოების წარმოებას კომპანიის მომსახურების არეალის მასშტაბით.