იაპონიაში გამართულ გამოფენაზე ქართული ღვინის შესახებ სემინარი ჩატარდა

იაპონიაში საკვები და სასმელი პროდუქტების ყოველწლიურ გამოფენაში – Foodex Japan 10 ქართული კომპანია მონაწილეობს.

როგორც „ინტერპრესნიუსს“ საქართველოს საგარეო საქმეთა სამინისტროდან აცნობეს, გამოფენის გახსნის ცერემონიალში საქართველოს საგანგებო და სრულუფლებიანი ელჩი ლევან ცინცაძე მონაწილეობდა.

გახსნის დღეს იაპონიაში საქართველოს საელჩოსა და საქართველოს ეროვნული ღვინის სააგენტოს ორგანიზებით, ქართული ღვინის შესახებ სემინარი ჩატარდა. ღონისძიებას სომელიეები, ბიზნეს კომპანიების და პრესის წარმომადგენლები ესწრებოდნენ. სტუმრებმა ქართველი და იაპონელი მომხსენებლის გამოსვლა მოისმინეს და ქართული ღვინო დააგემოვნეს.

გამოფენის ფარგლებში, ასევე გაიმართა იაპონური ღვინის კონკურსის “საკურა“ დაჯილდოების ცერემონიალი, რომელზეც კომპანია გრანპრი „დურუჯი ველის“ ღვინოს მიენიჭა. ცერემონიალზე საქართველოს საელჩო წარდგენილი იყო როგორც კონკურსის საპატიო სტუმარი.