შვედეთში,საქართველოს საელჩოს მიერ ინიცირებული პროექტი - „შვედეთის საუკეთესო კერძი“ მიმდინარეობს, რომლის გამარჯვებულიც ქართული სამზარეულოსა და ღვინის შესასწავლად საქართველოში ტურით დაჯილდოვდება.
როგორც „ინტერპრესნიუსს“ საქართველოს საგარეო საქმეთა სამინისტროდან აცნობეს, პროექტი სტოკჰოლმის საგამოფენო ცენტრთან - Stockholmsmassän თანამშრომლობით, სსიპ "ღვინის ეროვნული სააგენტოს"და "საქართველოს ტურიზმის ეროვნული ადმინისტრაციის" მხარდაჭერით ხორციელდება.
მათივე ინფორმაციით, მიმდინარე წლის 4 აპრილიდან სექტემბრამდე ჟიურის წევრები ყოველი თვის გამარჯვებულს შეარჩევენ. ისინი ერთმანეთს 9 სექტემბერს ე.წ. Stockholm Street Food ფესტივალის ფარგლებში შეეჯიბრებიან, რის შედეგადაც ორი ფინალისტი გამოვლინდება. ფინალი გაიმართება 11 სექტემბერს, ნორდიკულ რეგიონში ღვინისა და კვების უმსხვილესი გამოფენის Stockholm Food & Wine ფარგლებში. ფინალში გამარჯვებულს მთავარ პრიზად საქართველოში გასამგზავრებელი საგზური გადაეცემა.
კონკურის ამსახველი ინფორმაცია, შვედურ ენაზე, განთავსებულია ვებგვერდზე - http://www.sthlmfoodandwine.se/sveriges-paradratt?sc_lang=sv-se, სადაც მითითებულია უშუალოდ საქართველოსთან დაკავშირებული ვრცელი მასალის ამსახველი მომდევნო გვერდზე გადასასვლელი ბმული - http://www.sthlmfoodandwine.se/georgien/welcome-to-georgia?sc_lang=sv-se