პარლამენტმა მხარი არ დაუჭირა დებატების ფორმატის ისეთნაირად შეცვლას, რომ პრეზიდენტს პერმანენტულად დისკუსიაში ჩართვის საშუალება ჰქონოდა.

დებატების ფორმატის შეცვლის საკითხი პარლამენტის თავმჯდომარემ კენჭისყრაზე დააყენა. 28-მა დეპუტატმა დაუჭირა მხარი, რომ პრეზიდენტს საშუალება მისცემოდა, პერმანენტულ რეჟიმში დისკუსიაში ჩართულიყო, 50-მა კი წინააღმდეგ მისცა ხმა.

„ჩვენ ვაგრძელებთ მუშაობას, რეგლამენტით გათვალისწინებული ფორმატით. მე მინდა გამოვთქვა იმედი, რომ პრეზიდენტი გადახედავს თავის პოზიციას და პატივი სცემს საქართველოს პარლამენტის რეგლამენტს. მინდა გამოვთქვა იმედი, რომ საქართველოს პრეზიდენტი დაუბრუნდება პლენარულ სხდომათა დარბაზს“, - განაცხადა კობახიძემ.

შეგახსენებთ, რომ საქართველოს პრეზიდენტმა მოითხოვა დასკვნით სიტყვამდე დეპუტატების გამოსვლებზე პასუხის გაცემის საშუალება მისცემოდა, რაც პარლამენტის თავმჯდომარის თქმით, რეგლამენტის დარღვევაა. გიორგი მარგველაშვილმა სხდომათა დარბაზი დატოვა, ვიდრე საკანონმდებლო ორგანო დებატების ფორმატზე გადაწყვეტილებას არ მიიღებს.