"ცენტრ პოინტის" მშენებლობისგან დაზარალებულები მთავარ პროკურორს, ირაკლი შოთაძეს შეხვდნენ. შეხვედრაზე საუბარი ძირითადად მაია რჩეულიშვილთან და რუსუდან კერვალიშვილთან საპროცესო შეთანხმების გაფორმების საკითხს ეხებოდა. როგორც შეხვედრის შემდეგ ერთ-ერთმა დაზარალებულმა ირმა თხელიძემ განაცხადა, დაზარალებულები წინააღმდეგი არიან, რომ რჩეულიშვილთან საპროცესო გარიგება დაიდოს იქამდე, ვიდრე "ვილა რეზიდენსთან" და მ2-თან დადებული ხელშეკრულებები არ ამოქმედდება და მშენებლობები არ განახლდება.
"მივაღწიეთ იმ შეთანხმებას, რომ ვიდრე წინაპირობები არ შესრულდება, საპროცესო გარიგებაზე საუბარი არ იქნება. მიმდინარეობს ისევ მოლაპარაკებები. პროკურატურა გაესაუბრება მეორე მხარესაც. ამ შემთხვევაში პროკურატურა არის მედიატორის როლში. წინაპირობები უნდა შეასრულოს "ცენტრ პოინტმა", რათა, "ვილა რეზიდენსსა" და მ2-თან გაფორმებული ხელშეკრულებები ამუშავდეს. იქ არის რაღაც მერიის და სახელმწიფოს შესასრულებელი. ყველაფრის შესრულების შემდეგ დაიწყებს მოქმედებას ხელშეკრულება. ამ ყველაფრის შემდეგ სავარაუდოდ მოვილაპარაკებთ "ცენტრ პოინტთან" რაღაცაზე, რომ საბოლოო შედეგი დადგეს ჩვენთვისაც. როცა საქმის კეთება დაიწყება ამ შემთხვევაში დავთანხმდებით მაია რჩეულიშვილის გამოშვებას", - განაცხადა ირმა თხელიძემ.