საშიში ტენდენციაა, როდესაც თავისუფლების შეზღუდვის სფერო ფართოვდება, - ამის შესახებ „ევროპული საქართველოს“ წევრმა, ირაკლი კიკნაველიძემ განაცხადა.

როგორც „ინტერპრესნიუსს“ პარტიიდან აცნობეს, კიკნაველიძე გამოეხმაურა ინიციატივას, რომლის თანახმად, ფართოვდება იმ საჯარო მოხელეების წრე, რომლებსაც აქციებსა და მანიფესტაციებში მონაწილეობის შეზღუდვა აქვთ.

“ლეგიტიმურია, როდესაც პოლიციელებს და ჯარისკაცებს შეზღუდული აქვთ მანიფესტაციების მოწყობის თავისუფლება, მაგრამ პრობლემას წარმოადგენს ის, რომ ფართოვდება იმ სფეროების და იმ ადამიანებისა სივრცე, რომლებსაც ეს უფლება შეეზღუდებათ. მაგალითად ასეთი არის მეხანძრე, მეტყევე, რომელიც ტყეში თოფით იცავს, რომ უკანონოდ ხე არავინ მოჭრას, მაგრამ მას უნდა ჰქონდეს და მას აქვს უფლება მშვიდობიანად გააპროტესტოს მისთვის მნიშვნელოვანი თემა. ამიტომ ზოგადად, ამ საკითხთან დაკავშირებით მომეტებული სიფრთხილე გვჭირდება ყველას იმიტომ, რომ საშიშია თავად ტენდენცია, როცა თავისუფლებების შეზღუდვის სფერო ფართოვდება“, - განაცხადა ირაკლი კიკნაველიძემ.