გარდაცვლილის, დ.ს.-ის თანმხლებმა არც ერთმა პირმა არ ითანამშრომლა გამოძიებასთან, რაც შეეხება ბრალდებულის თანხმლებ ოთხ პირს, მათ მიაწოდეს გამოძიებას ინფორმაცია იმ პირების შესახებ, რომელთაც აღნიშნულ ინციდენტში დანა ჰქონდათ და გამოიყენეს, - ამის შესახებ მთავარ პროკურატურაში გამართულ ბრიფინგზე განაცხადეს, სადაც პროკურორმა ხორავას ქუჩაზე მომხდარი მკვლელობის საქმის მასალებზე ისაუბრა.

როგორც პროკურორმა განმარტა, სულ საქმეზე 100-ზე მეტი პირი გამოიკითხა, თუმცა გამოძიებასთან მხოლოდ რამდენიმემ ითანამშრომლა.

„საქმეზე დაკითხულია 100-ზე მეტი მოწმე. მათ შორის, უშუალოდ ინციდენტში მონაწილე სკოლის 14 მოსწავლე, რომელიც ახლდნენ გარდაცვლილ დ.ს-ს. ასევე გვინდა აღვნიშნოთ, რომ ვერც ერთმა მათგანმა ვერ მიაწოდა გამოძიებას საქმისათვის მნიშვნელოვანი ინფორმაცია. ასევე დაიკითხა ჩხუბში მონაწილე მეორე მხარე. ბრალდებულის თანმხლებმა 4 არასრულწლოვანმა რეალურად ითანამშრომლა გამოძიებასთან, მიაწოდეს გამოძიებას ინფორმაცია იმ პირების შესახებ, რომელთაც აღნიშნულ ინციდენტში დანა ჰქონდათ და გამოიყენეს. მათი აქტიურად თანამშრომლობის შედეგად ცხელ კვალზე მოხდა მკვლელობის გახსნა და მკვლელობის ჩამდენი პირების დაკავება. აღსანიშნავია, რომ ორივე ბრალდებულმა წინასწარი გამოძიების ეტაპზე გამოიყენა დუმილის უფლება და არ მომხდარა მათი დაკითხვა. მათ სასამართლოში ჩვენება მხოლოდ მათი დაკავებიდან 6 თვის შემდეგ მისცეს. ამ ჩვენებების სანდოობას პროკურატურა შეაფასებს საქმეში არსებულ სხვა მტკიცებულებებთან მიმართებაში“, - განაცხადა პროკურორმა.