30-31 მაისს თბილისს გერმანიის შეიარაღებული ძალების გენერალური შტაბის უფროსი, გენერალი ებერჰარდ ცორნი ესტუმრება.

როგორც „ინტერპრესნიუსს“ საქართველოში გერმანიის საელჩოდან აცნობეს, ვიზიტის ფარგლებში გენერალი შეხვდება საქართველოს შეიარაღებული ძალების გენერალური შტაბის უფროსს, გენერალ-მაიორ ვლადიმერ ჩაჩიბაიას და მასთან საქართველოსა და გერმანიის შეიარაღებული ძალების წარმატებულ თანამშრომლობაზე და ავღანეთის ჩრდილოეთში მიმდინარე მისიაში ერთობლივი მონაწილეობის გაგრძელებაზე ისაუბრებს. გარდა ამისა, გენერალი ცორნი შეხვდება საქართველოს თავდაცვის მინისტრს ლევან იზორიას.

გენერალი ცორნი გვირგვინით შეამკობს გმირთა მოედანზე მდებარე გმირთა მემორიალს და ასევე კრწანისის ნატო-საქართველოს ერთობლივი წვრთნისა და შეფასების ცენტრს ესტუმრება.