ფრაქცია "ერთიანი ნაციონალური მოძრაობის" ლიდერი რომან გოცირიძე სირიის მიერ აფხაზეთისა და ცხინვალის რეგიონის „დამოუკიდებლად აღიარებას“ რუსეთთან წარმოებული უსუსური პოლიტიკის შედეგად მიიჩნევს.

ამასთან, გოცირიძე ამბობს, რომ საქართველოს ხელისუფლებამ ვერ იმუშავა ირანთან, რომელსაც სირიაზე გარკვეული გავლენა აქვს.

"ეს არის პირდაპირი უსუსურობა საქართველოს ხელისუფლების იმ პოლიტიკისა, რომელსაც იგი აწარმოებს რუსეთთან. რუსეთთან რბილი, მომრიგებლური პოლიტიკის შედეგია ის, რომ რუსეთი არასდროს იხდის არც პოლიტიკურ და არც ეკონომიკურ ფასს საქართველოსთან დაკავშირებით. არასდროს მომხდარა სანქციების დაწესება რუსეთის წინააღმდეგ საქართველოსთან მიმართებაში და ეს არის საქართველოს ხელისუფლების ერთ-ერთი დიდი შეცდომა, რაც, საბოლოო ჯამში, რუსეთის თავგასულობაში ვლინდება. ამავდროულად, საქართველომ ვერ იმუშავა იმ ქვეყნებთან, რომელსაც სირიაზე დიდი გავლენა აქვთ, თუნდაც იგივე ირანთან, რომელიც არის დღეს სირიის პატრონი. მთლიანობაში რუსეთთან არსებული პოლიტიკა წახალისებაა მსგავსი ნაბიჯების გადასადგმელად, რაც ახლა მოხდა აღიარების სახით", - განაცხადა გოცირიძემ.

შეგახსენებთ, რომ სირიის არაბულმა რესპუბლიკამ ოკუპირებული აფხაზეთისა და „სამხრეთ ოსეთის“ დამოუკიდებლობა დღეს აღიარა.