უკრაინის პარლამენტმა ანტიკორუფციული სასამართლოს შესახებ კანონი მიიღო. კანონის თანახმად, უმაღლესი ანტიკორუფციული სასამართლო მაღალჩინოსნებს შორის კორუფციის საქმეებს განიხილავს.
კერძოდ, საუბარია ისეთ დანაშაულებზე, როგორიც არის საბიუჯეტო სახსრების არამიზანშეწონილი გამოყენება, ძალაუფლების ბოროტად გამოყენება, არაკანონიერი გამდიდრება, ქრთამის აღება და ა.შ.
აღნიშნულ კანონპროექტს მხარი 315 დეპუტატმა დაუჭირა.
კენჭისყრამდე პარლამენტში სიტყვით უკრაინის პრეზიდენტი პეტრო პოროშენკო გამოვიდა. მან დეპუტატებს მოუწოდა მხარი დაეჭირათ კანონპროექტისთვის. მისი თქმით, აღნიშნული კანონი ასრულებს ქვეყანაში ანტიკორუფციული ინსტიტუტების ჩამოყალიბებას.
აღსანიშნავია, რომ აქამდე უკრაინის პრემიერ-მინისტრმა ვლადიმერ გროისმანმა განაცხადა, რომ იმ შემთხვევაში თუ პარლამენტი ანტიკორუფციული სასამართლოს შესახებ კანონს არ მიიღებდა, ის გადადგებოდა თანამდებობიდან.