დღეს გაიმართება კონსულტაციები და სავარაუდოდ დღესვე გახდება ცნობილი, თუ ვინ იქნება მომავალი პრემიერ-მინისტრი, - ამის შესახებ პარლამენტის საპროცედურო საკითხთა და წესების კომიტეტის თავმჯდომარემ, გიორგი კახიანმა ტელეკომპანია „იმედის“ ეთერში განაცხადა.

“კანდიდატზე წინასწარ არ ვართ შეჯერებული, გამომდინარე იქიდან, რომ პირადად ჩემთვის ცოტა მოულოდნელი იყო პრემიერის ეს გადაწყვეტილება. რა თქმა უნდა, ზოგადად, არაერთი კანდიდატი შეიძლება განიხილებოდეს ჩვენი რიგებიდან. კონსულტაციები წარიმართება და იქნება ცნობილი საზოგადოებისთვის უკვე პირველი შეფასებები და ვარაუდები იმასთან დაკავშირებით, თუ ვინ იქნება მომავალი პრემიერ-მინისტრი“, - განაცხადა გიორგი კახიანმა.

ამასთან, როგორც ცნობილია, საპარლამენტო უმრავლესობის სხდომა დღეს, 17:00 საათზეა დანიშნული.

გიორგი კვირიკაშვილი თანამდებობიდან გადადგა. კონსტიტუციის თანახმად, პრემიერის გადადგომასთან ერთად, მთავრობის შემადგენლობაც გადამდგარად ითვლება.