საქართველოს უზენაეს სასამართლოში, ევროკავშირისა და ევროპის საბჭოს ერთობლივი პროექტის ,,საქართველოს ადამიანის უფლებათა ევროპული კონვენციის გამოყენების გაძლიერება“ ფარგლებში სამუშაო შეხვედრა - ,,ადამიანის უფლებათა ევროპული კონვენციის მე-16 დამატებითი ოქმის გამოყენება“ - გაიმართა.
როგორც „ინტერპრესნიუსს“ უზენაესი სასამართლოდან აცნობეს, შეხვედრას საქართველოს უზენაესი სასამართლოს სამოქალაქო და ადმინისტრაციულ საქმეთა პალატების მოსამართლეები და თანაშემწეები, აგრეთვე ანალიტიკური განყოფილების თანამშრომლები ესწრებოდნენ.
„მე-16 ოქმის განმარტება მინისტრთა კომიტეტის ადამიანის უფლებათა კომიტეტის გადაწყვეტილებების მიხედვით - DH-GDR(2012)020, სუბსუდიურობის პრინციპის განმარტება ადამიანის უფლებათა ევროპული სასამართლოს გადაწყვეტილებების მიხედვით, პრაქტიკული რეკომენდაციები ადამიანის უფლებათა ევროპული სასამართლოსთვის საკონსულტაციო დასკვნის მოთხოვნის ფორმულირებასთან დაკავშირებით, მუხლი 391 - სააპელაციო სასამართლოს გადაწყვეტილება ეწინააღმდეგება მსგავს სამართლებრივ საკითხზე ადამიანს უფლებათა და ძირითად თავისუფლებათა დაცვის კონვენციას და ადამიანს უფლებათა ევროპული სასამართლოს პრეცედენტულ სამართალს - ამ თემებზე შეხვედრის მონაწილეებს ევროპის საბჭოს ექსპერტი ნინო ხაინდრავა ესაუბრა,“ - ნათქვამია უზენაესი სასამართლოს ინფორმაციაში.
მათივე ცნობით, შეხვედრის ბოლოს რეფორმის მესამე ტალღის ფარგლებში საკასაციო საჩივრის დასაშვებობის კრიტერიუმთან დაკავშირებით დისკუსია გაიმართა.
სამუშაო შეხვედრა ,,ადამიანის უფლებათა ევროპული კონვენციის მე-16 დამატებითი ოქმის გამოყენება“ უზენაეს სასამართლოში ხვალაც გაგრძელდება, რომელსაც საერთო სასამართლოების, საქალაქო, სააპელაციო და რეგიონალური სასამართლოების მოსამართლეები და ანალიტიკური განყოფილებების წარმომადგენლები დაესწრებიან.