ერთთვიანი მძიმე მარხვის შემდეგ, რამადან ბაირამს აჭარაშიც აღნიშნავენ. მორწმუნეებმა სადღესასწაულო ლოცვა ბათუმში მდებარე მეჩეთებში აღავლინეს.
როგორც ქართველ მუსლიმთა კავშირის თავმჯდომარემ, ტარიელ ნაკაიძემ ჟურნალისტებთან საუბრისას განაცხადა, ბათუმში ახალი მეჩეთის მშენებლობისთვის მუსლიმი მრევლი სამართლებრივად იბრძვის. მისივე განცხადებით, თუ ახალი მეჩეთის მშენებლობის ნებართვას ბათუმის მერია არ მისცემს, ისინი უნებართვოდ გეგმავენ მორიგი სამლოცველოს მშენებლობას.
მუსლიმ მორწმუნეებს რამადან ბაირამი აჭარის მთავრობის თავმჯდომარემაც მიულოცა. როგორც ზურაბ პატარაძემ აღნიშნა, მეჩეთის საკითხზე მოლაპარაკებები მიმდინარეობს და უახლოეს პერიოდში ახალი მეჩეთის მშენებლობასთან დაკავშირებით გადაწყვეტილება გახდება ცნობილი.