ბრიტანელი ფოტოგრაფი მარტინ პარი თბილისის შესახებ კატალოგს შექმნის

თბილისს ცნობილი ბრიტანელი ფოტოგრაფი, Magnum Photos-ს სრულუფლებიანი წევრი მარტინ პარი ეწვია. როგორც „ინტერპრესნიუსს“ „თიბისი ბანკიდან“ აცნობეს, 1980-იანი წლების ერთ-ერთი ყველაზე წარმატებული ფოტოგრაფი და პრესტიჟული სააგენტო „მაგნუმის“ წევრი საქართველოში თბილისის მერიის მოწვევით 11 ივნისს ჩამოვიდა და 16 ივნისამდე დარჩება. ფოტოები, რომელსაც ის გადაიღებს თბილისში, Magnum Photos სხვა ფოტოგრაფების მიერ გადაღებულ ფოტოებთან ერთად, 2018 წლის ფრანკფურტის წიგნის ბაზრობაზე „თიბისის“ მხარდაჭერით საქართველოს საპატიო სტუმარი ქვეყნის პავილიონში გამოიფინება.

ასევე, გაიმართება წიგნის „თბილისი მარტინ პარის მიერ/City Book Tbilisi by Martin Parr“ პრეზენტაცია, რომელიც ფოტოგრაფის თბილისში გადაღებული ფოტოების მიხედვით შეიქმნება და ერთ-ერთ ცნობილ გერმანულ გამომცემლობასთან Prestel Publishing - თან თანამშრომლობით მიუნჰენში გამოიცემა.

როგორც „თიბისი ბანკში“ აცხადებენ, მნიშვნელოვანია, რომ თბილისის მერიას მაგნუმ ფოტო, საჩუქრად გადმოსცემს მთლიან ექსპოზიციას, რომლის ნახვაც ნებისმიერ დამთვალიერებელს უკვე ჩვენს დედაქალაქში შეეძლება.

„მარტინ პარიმ საერთაშორისო აღიარება მოიპოვა ინოვაციური სახეების და სოციალური ფოტოგრაფიის მიმართ განსხვავებული მიდგომის, ასევე დიდ ბრიტანეთში და მის გარეთ ფოტოგრაფიის კულტურაში შეტანილი წვლილისთვის. მის ნამუშევრებში დაკვირვების სიზუსტემ და ფერმა იგი 80-იანი წლების ყველაზე უფრო წარმატებული და პოპულარული ფოტოგრაფების სიაში მოახვედრა, რის შედეგად ის პრესტიჟული სააგენტო მაგნუმის მთავარი წევრი გახდა.

ქალაქების შესწავლისას ის ათვალიერებს, ეცნობა ეროვნულ მახასიათებლებსა და საერთაშორისო ფენომენებს, რათა გამოარკვიოს, რამდენად გამოადგება ეს ყველაფერი მომავალ თაობებს ჩვენი კულტურული თავისებურებების გასაგებად. პარი ჩვენთვის კარგად ნაცნობს საგნებს, სრულიად სხვა თვალით გვანახებს და სწორედ ამიტომ, ის იქნა თბილისში მოწვეული, რომ ევროპას დავანახოთ სხვა, ავთენტური, ძველის და ახლის სინთეზით შერწყმული თბილისი.

თემები, რომლებსაც პარი ირჩევს და ის, თუ როგორ განუმეორებლად ექცევა მათ, გამოარჩევს მას სხვა ფოტოგრაფებისაგან იმ ნიშნით, რომ მისი შემოქმედება განგრძობით სერიებს მოიცავს. მისი უჩვეულო სტრატეგიის ნაწილია ერთისა და იმავე ფოტოების გამოქვეყნება სხვადასხვა კონტექსტში, გამოფენებზე, ხელოვნების წიგნებში. ამ მიდგომის, მისი სტილისა და თემების არჩევანის წყალობით, ის უკვე დიდი ხანია მისაბაძი მაგალითია ახალგაზრდა ფოტოგრაფებისათვის.

Magnum Photos ფოტოგრაფული კოოპერატივია, რომელიც თავად წევრ-ფოტოგრაფებს ეკუთვნის. ძლიერი ინდივიდუალური ხედვით, Magnum Photos-ს ფოტოგრაფები აღწერენ მსოფლიოს და განმარტავენ მსოფლიო ხალხებს, მოვლენებს, პიროვნებებსა და პრობლემებს. ოთხი სარედაქციო ოფისით ნიუ იორკში, ლონდონში, პარიზსა და ტოკიოში და 15 ქვე-სააგენტოს ქსელით, „მაგნუმ ფოტოს’ ფოტოებით ამარაგებს პრესას, გამომცემლებს, სარეკლამო სფეროს, ტელევიზიას, გალერეებსა და მუზუემებს მთელი მსოფლიოს მასშტაბით. მაგნუმის ფოტო ბიბლიოთეკა ცოცხალი არქივია, რომელიც ყოველდღიურად ახლდება მსოფლიოს სხვადასხვა წერტილიდან მიწოდებული ნამუშევრებით. ბიბლიოთეკაში ინახება მაგნუმის ფოტოგრაფების ყველა ნამუშევარი და რამდენიმე არა-წევრი ფოტოგრაფის სპეციალური კოლექციები. დაახლოებით ერთი მილიონი ფოტო ინახება ფიზიკურ ბიბლიოთეკაში და 350 000 - ონლაინ. ყველა მნიშვნელოვანი მსოფლიო მოვლენის ამსახველი კადრები ესპანეთის სამოქალაქო ომიდან დღემდე ბიბლიოთეკაში ინახება. მაგნუმის ბიბლიოთეკა ასახავს ცხოვრების ყველა ასპექტს მსოფლიოს მასშტაბით, და დოკუმენტური ფოტოგრაფების საუკეთესო კოლექტივის ხედვის საოცარ შეგრძნებას, წარმოსახვასა და ბრწყინვალებას.

პროექტი ხორციელდება თბილისის მერიის მიერ. მხარდამჭერები არიან: „თიბისი“, Magnum Photos, „ქართული წიგნის ეროვნული ცენტრი“ და „საქართველოს ტურიზმის ეროვნული ადმინისტრაცია“, საქართცველოს წიგნის გამომცემელთა და გამავრცელებელთა ასოციაცია და საქართველოს ავიახაზები“, - ნათქვამია ინფორმაციაში.

რამაზ საყვარელიძე - ქართულ პოლიტიკაში უშინაარსობა უნდა დამთავრდეს, თორემ ერთფეროვნებაში, როცა არც პურია და არც სანახაობა, კიდევ უფრო გაიზრდება პოლიტიკური ნიჰილიზმი
ქართული პრესის მიმოხილვა 21.09.2019
„სოფლად ცხოვრება, როგორც ტურისტული პროდუქტი” - რა იგეგმება ბათუმში 20-21 სექტემბერს?
გერმანიის ფრეზენიუსის ინსტიტუტის ლაბორატორიის  დასკვნით მარნეულის სასურსათო ქარხნის წარმოების ტრადიციულ წითელ ტყემალში სუდანის ჯგუფის საღებავები არ აღმოჩნდა (R)
„ვისოლმა“ თვითმომსახურების პირველი ავტოგასამართი სადგური გახსნა