საქართველოს პრეზიდენტის საერთაშორისო მდივანი თენგიზ ფხალაძე რუმინეთის ქალაქ კონსტანცაში შავი ზღვისა და ბალკანეთის ფორუმის მუშაობაში მონაწილეობს, - ამის შესახებ „ინტერპრესნიუსს“ პრეზიდენტის ადმინისტრაციიდან აცნობეს.

მათი ინფორმაციით, ფორუმზე, რომელიც ნატო-სა და რუმინეთის საგარეო საქმეთა სამინისტროს მხარდაჭერით ტარდება, თენგიზ ფხალაძე სიტყვით გამოვიდა და რეგიონისა და ევროატლანტიკურ უსაფრთხოებაში საქართველოს როლზე ისაუბრა.

პრეზიდენტის საერთაშორისო მდივანმა ნატო-ს მომავალი სამიტის სამზადისზე ისაუბრა და აღნიშნა, რომ საქართველოს ალიანსში ინტეგრაცია მნიშვნელოვანია შავი ზღვის უსაფრთხოებისთვის.

თენგიზ ფხალაძემ იმ შესაძლებლობებს გაუსვა ხაზი, რასაც საქართველო საერთაშორისო პარტნიორობისა და კეთილდღეობისთვის ქმნის. მან ასევე მიმოიხილა ჰიბრიდული საფრთხეები და რუსეთის მიერ განხორციელებული აგრესიული პოლიტიკა, ოკუპირებულ ტერიტორიებზე შექმნილი ვითარება და საერთაშორისო სამართლებრივი ნორმების დარღვევების ფაქტები.