თამარ ჩუგოშვილი - არჩევნების მოახლოებასთან ერთად, „ნაციონალური მოძრაობა“ პროვოკაციულ ქმედებებს ამძაფრებს, რაც მიუღებელია

„ნაციონალური მოძრაობისგან“ პროვოკაციულ ქმედებებს მიჩვეული ვართ, თუმცა როგორც ჩანს, არჩევნების მოახლოებასთან ერთად, მსგავს ნაბიჯებს კიდევ უფრო ამძაფრებენ და ეს მიუღებელია, - ამის შესახებ „ინტერპრესნიუსს“ პარლამენტის ვიცე-სპიკერმა, თამარ ჩუგოშვილმა განუცხადა.

“რაც შეეხება ოზურგეთის ინციდენტს, იქ ფიზიკურ დაპირისპირებას ჰქონდა ადგილი და რა თქმა უნდა საგამოძიებო უწყებები ჩაერთნენ, იძიებენ და შესაბამისი პასუხისმგებლობაც დადგება. თუმცა ბოლო პერიოდში ძალიან გააქტიურდა საჯარო სივრცეში შეურაცხმყოფელი, დამამცირებელი და ზოგიერთ შემთხვევაში მუქარის შემცველი კომენტარები. მსგავს შემთხვევას ბევრ ადგილას ვაფიქსირებთ და ჩვენი პოზიციაა, რომ ეს ემსახურება „ნაციონალური მოძრაობის“ მხრიდან გარკვეული ფიზიკური დაპირისპირებების პროვოცირებას, რისი თავიდან აცილებაც არის აუცილებელი. მუქარის შემცველი განცხადებები სადაც კეთდება და სადაც შესაძლებელია სამართლებრივი მექანიზმის გამოყენება, მსგავს შემთხვევებს შევატყობინებთ სამართალდამცველებს. ასევე მოვუწოდებთ ჩვენს მხარდამჭერებს, რომ მსგავსი ტიპის პროვოკაციებს არ აჰყვნენ, რადგან ეს შეიძლება გადაიზარდოს ფიზიკურ დაპირისპირებაში, რაც შემდგომ დიდ დაპირისპირებას იწვევს. ასევე ვაპირებთ, რომ ასეთი ფაქტების შესახებ შევატყობინოთ ჩვენს უცხოელ პარტნიორებს, რადგან გვაქვს იმის განცდა, რომ არის გარკვეული მცდელობა, ასეთი დაპირისპირებების პროვოცირების“, - განაცხადა ჩუგოშვილმა.

რაც შეეხება კონკრეტულად ოზურგეთში მომხდარ ინციდეტს, ვიცე-სპიკერის შეფასებით, იქ მოხდა ფიზიკური დაპირისპირება და ვინც არ უნდა იყოს დამნაშავე, კანონის თანახმად უნდა დაეკისროს პასუხისმგებლობა.

“ოზურგეთში მომხდართან დაკავშირებით გამოძიება მიმდინარეობს და შესაბამისი შედეგიც დადგება. თუმცა, მინდა ეს შემთხვევა სხვა შემთხვევებისგან გავმიჯნო, სადაც ჩვენ ვაფიქსირებთ მცდელობებს, რომ ასეთივე დაპირისპირებები იყოს გამოწვეული. იმედია, ამ ყველაფერს ერთად ავიცილებთ თავიდან. ზოგადად, „ნაციონალური მოძრაობის“ მხრიდან პროვოკაციული ტიპის ქმედებებს მიჩვეული ვართ ყველა, ეს სიახლე არ არის და როგორც ჩანს, არჩევნების მოახლოებასთან ერთად, მსგავს ნაბიჯებს კიდევ უფრო ამძაფრებენ, მაგრამ ეს ნაბიჯები არის მიუღებელი, უკანონო და იწვევს სრულიად მიუღებელი მოვლენების განვითარებას. ისეთების, როგორიც არის ფიზიკური დაპირისპირებები და მე არ მიმაჩნია, რომ ეს პოლიტიკური ბრძოლის ლეგიტიმური გზა შეიძლება იყოს“, - აღნიშნა ვიცე-სპიკერმა.

ოზურგეთის საკრებულოს შენობაში "ნაციონალური მოძრაობის" დეპუტატ ბესო ქათამაძეს სიტყვიერი და ფიზიკური შეურაცხყოფა მიაყენეს, რის შედეგადაც მან თავის არეში დაზიანება მიიღო. შინაგან საქმეთა სამინისტროს ინფორმაციით, მომხდარზე “ქართული ოცნების“ დეპუტატს ტარიელ აროშიძეს ბრალი წარედგინა.

თორნიკე შარაშენიძე  - „ოცნებას“ სურს ხელისუფლებაში მესამე ვადითაც დარჩენა და ამისთვის სიტუაციას ამზადებს
ქართული პრესის მიმოხილვა 17.08.2019
მიხეილ უკლება - ანაკლიის პროექტის განსახორციელებლად დიდი მნიშვნელობა აქვს, როგორ დაბალანსდება შავი ზღვის რეგიონში გლობალური და რეგიონალური მოთამაშეების ინტერესები
კომპანიამ Aviabiletebi.org მობილური აპლიკაცია ანდროიდის სისტემაზეც განაახლა
SS.ge-ში გუგლის სერვისების ინტეგრაცია მოხდა
Cushman and Wakefield Georgia-ს კვლევის მიხედვით "გალერია თბილისი" თბილისის საუკეთესო სავაჭრო ცენტრად დასახელდა
საერთაშორისო სარეიტინგო კომპანია Scope Ratings-მა სს „ნიკორას“  BB- რეიტინგი მიანიჭა, სს „ნიკორა ტრეიდს“ B+ რეიტინგი დაუდასტურა