გუგული მაღრაძე – სტუდენტები, რომლებიც საზაფხულო სკოლის კურსს საქართველოში გაივლიან, უფრო მოტივირებულნი იქნებიან საერთაშორისო ასპარეზზე ჩვენს ქვეყანასთან დაკავშირებული საკითხების გადაწყვეტისას

ივანე ჯავახიშვილის სახელობის თბილისის სახელმწიფო უნივერსიტეტში საზაფხულო სკოლა - „ რეგიონული უსაფრთხოება და კონფლიქტების მოგვარება“ გაიხსნა.

როგორც „ინტერპრესნიუსს“ საქართველოს პარლამენტიდან აცნობეს, სტუდენტებს მისასალმებელი სიტყვით განათლების, მეცნიერებისა და კულტურის კომიტეტის თავმჯდომარის მოადგილემ, გუგული მაღრაძემ მიმართა.

გუგული მაღრაძის ინფორმაციით, თსუ კონფლიქტოლოგიის ინსტიტუტსა და სან-დიეგოს სახელმწიფო უნივერსიტეტს შორის გაფორმებული მემორანდუმის ფარგლებში, თბილისის სახელმწიფო უნივერსიტეტში უკვე მესამედ ტარდება საზაფხულო სკოლა რეგიონული უსაფრთხოების და კონფლიქტების მოგვარების საკითხებზე.

„საზაფხულო სკოლაში მონაწილეობენ სან-დიეგოს სახელმწიფო უნივერსიტეტის სტუდენტები, რომლებიც საერთაშორისო უსაფრთხოების სპეციალობაზე სწავლობენ. ისინი ისმენენ ხუთკრედიტიან კურსს. ლექცია-სემინარებს ცნობილი ქართველი მეცნიერები და ექსპერტები ატარებენ“, - განაცხადა საქართველოს პარლამენტის წევრმა.

ლექცია-სემინარებზე განიხილება ისეთი თემები, როგორიცაა: საქართველო და ნატო, საქართველო და ევროკავშირი, რეგიონის ენერგეტიკული უსაფრთხოება, საქართველოს სახელმწიფოს მიდგომები კონფლიქტების მოგვარებისადმი, რუსეთი და რეგიონული უსაფრთხოების საკითხები, ადამიანის უფლებები რეგიონში, გარემოსდაცვითი პრობლემები სამხრეთკავკასიაში, რეგიონის განვითარების ეკონომიკის გამოწვევები, რელიგიის როლი რეგიონული უსაფრთხოების საკითხებში. სტუდენტები ლექცია-სემინარებს 3 კვირის განმავლობაში მოისმენენ.

როგორც გუგული მაღრაძემ აღნიშნა, სტუდენტებისთვის მომზადებულია კულტურულ-საგანმანათლებლო პროგრამა, რომლის ფარგლებშიც, ახალგაზრდები საქართველოს სხვადასხვა მხარეში იმოგზაურებენ და ქვეყნის ისტორიულ-კულტურულ მემკვიდრეობასა და თანამედროვეობას გაეცნობიან.

„სტუდენტები, მომავალში, ამერიკის შეერთებულ შტატებსა და სხვა ქვეყნებში ისეთ სამსახურებში დასაქმდებიან, რომელსაც შესაძლოა, პირდაპირი მიმართება ჰქონდეს რეგიონული უსაფრთხოების პრობლემებთან. მიღებული ცოდნა, გამოცდილება და ის დადებითი დამოკიდებულება, რაც საქართველოს მიმართ შეუმუშავდებათ, მეტი გარანტიაა, რომ ისინი უფრო ღია, უფრო მონდომებულნი იქნებიან საერთაშორისო ასპარეზზე საქართველოს საკითხების გადაწყვეტისას“, - განაცხადა განათლების, მეცნიერებისა და კულტურის კომიტეტის თავმჯდომარის მოადგილემ.

ვალერი სოლოვეი - კრემლის ქმედებების მოაზროვნე გამმართლებლები, ვინც საქართველოს საქმეებში ჩახედულია, თვლიან, რომ რუსეთს აღარ შეუძლია საქართველოს  პოლიტიკაზე გავლენის მოხდენა
ქართული პრესის მიმოხილვა 22.08.2019
ვახტანგ ძაბირაძე -  შემოდგომა იქნება ოპოზიციურ ფლანგზე ძალების ჩამოყალიბების პროცესი, ამიტომ არ მაქვს მოლოდინი, რომ ცხელი შემოდგომა გვექნება
პრემიუმ ხარისხის მინების ყველაზე მსხვილი იმპორტიორი კომპანია „ჯეო გლასს“ საკუთარ მომხმარებლებს სიახლეს სთავაზობს
პროექტ „ბათუმი რივიერასთან“ დაკავშირებით „სილქროუდ ჯგუფი“ განცხადებას ავრცელებს