უკრაინის პარლამენტის შენობასთან მომიტინგეებსა და პოლიციას შორის ჩხუბი მოხდა

უკრაინის პარლამენტის შენობასთან მომიტინგეებსა და პოლიციას შორის ჩხუბი მოხდა. უკრაინული მედიის ინფორმაციით, ავღანეთის ომის ვეტერანებმა დღეს გრუშევსკის ქუჩა გადაკეტეს და ხელისუფლებას სოციალური მოთხოვნები წაუყენეს. სავარაუდოდ, შეტაკების შედეგად არიან დაშავებულებიც, თუმცა კონკრეტული ინფორმაცია ამის შესახებ არ ვრცელდება.

მომიტინგეებთან გამოვიდა პარლამენტის პირველი ვიცე-სპიკერი ირინა გერაშჩენკო და მათ საინიციატივო ჯგუფის შექმნა და მოლაპარაკებების დაწყება შესთავაზა.

„მინდა ვთხოვო აქციის ხელმძღვანელებს, ჩამოაყალიბონ საინიციატივო ჯგუფი და ერთად შევიდეთ პარლამენტში. შემდეგ, როდესაც შესვენება გამოცხადდება, ჩვენ ერთად გამოვალთ და მუშაობის შედეგებს გაგაცნობთ“, - განაცხადა გერაშჩენკომ.