ქუთაისში, სოციალური საცხოვრისის მობინადრეებს, რომლებიც დღეს მერიის წინ შეიკრიბნენ და აქციას მართავდნენ, ქუთაისის მერის მოადგილე იუზა უგულავა შეხვდა.
უგულავას თქმით, მოქალაქეები დათანხმდნენ, რომ დაელოდებიან გამოძიების შედეგებს, რომლის შემდეგაც გადაწყდება, თუ ვის უნდა დაეკისროს პასუხისმგებლობა სოციალური საცხოვრისის აღდგენაზე. მანამდე კი, როგორც მერის მოადგილე აცხადებს, დაწყებულია სასწრაფო გადაუდებელი სამუშაოები, რათა იქ ცხოვრება საფრთხეს არ წარმოადგენდეს ადამიანებისთვის.
შპს „სანომ“ უკვე დაიწყო შენობის გამაგრება, რომელმაც გასულ წელს ააშენა აღნიშნული სოციალური საცხოვრისი. აქციის მონაწილეები, რომლებიც აცხადებენ, რომ შენობა ავარიულია და შენობიდან მათ გაყვანას მოითხოვენ, კვლავ საცხოვრისში დაბრუნდნენ.