თბილისის საქალაქო სასამართლოში ხორავას ქუჩაზე მოზარდების მკვლელობის საქმეზე დანაშაულის დაფარვაში ბრალდებულთა საქმის განხილვა მიმდინარეობს.
დღეს ბრალდების მხარე ოთხი მოწმის დაკითხვას გეგმავს. ასევე პროკურატურა სასამართლოს იმ განაჩენს წარუდგენს მტკიცებულებად, რომლითაც ხორავას ქუჩაზე მოზარდების მკვლელობაში ბრალდებულებს გ.ბ.-ს და გ.ჯ.-ს თავისუფლების აღკვეთა შეეფარდათ.
სასამართლო სხდომის დაწყებამდე პროკურორებს მოწმეების ვინაობა არ დაუსახელებიათ, თუმცა როგორც "ინტერპრესნიუსისთვის" გახდა ცნობილი, დღევანდელ პროცესზე საქმის ერთ-ერთი მთავარი მოწმე გიორგი თურქია იკითხება.
მოზარდებს შორის მომხდარი კონფლიქტის შემდეგ თენგიზ კალანდია სწორედ თურქიასთან ერთად მივიდა იმ ადგილას, სადაც ხორავას ქუჩიდან გაქცევის შემდეგ მიხეილ კალანდია და კონფლიქტში მონაწილე კიდევ ერთი მოზარდი, რომელიც ახლა უკვე დავით სარალიძის მკვლელობის მცდელობისთვისაა მსჯავრდებული, იმალებოდნენ. სწორედ თურქიას მანქანით წამოიყვანეს ორივე მოზარდი კალანდიების სახლში.