გარემოს დაცვისა და სოფლის მეურნეობის სამინისტროს საინფორმაციო-საკონსულტაციო სამსახურის წარმომადგენლებმა და სამეცნიერო-კვლევითი ცენტრის სპეციალისტებმა, ერთობლივი პროექტის „მობილური ექსტენცია“ ფარგლებში, სამეგრელოს რეგიონში ფერმერებს კონსულტაციები გაუწიეს და თემატური ბროშურები გადასცეს.
როგორც „ინტერპრესნიუსს“ გარემოს დაცვისა და სოფლის მეურნეობის სამინისტროდან აცნობეს, მცენარეთა დაცვის, ციტრუსის და დაფნის მოვლა-მოყვანის და ვეტერინარიის საკითხებზე ადგილობრივებმა ამომწურავი ინფორმაცია მიიღეს.
მათივე ცნობით, სპეციალისტებმა ერთი კვირის განმავლობაში აბაშის, ზუგდიდის, სენაკის და ხობის 18 სოფელი მოიარეს.
გარემოს დაცვისა და სოფლის მეურნეობის სამინისტროს და სოფლის მეურნეობის სამეცნიერო-კვლევითი ცენტრის ერთობლივი პროექტი „მობილური ექსტენცია“ 2016 წლიდან მიმდინარეობს და საქართველოს ყველა რეგიონს მოიცავს. პროექტის მიზანია ადგილობრივი ფერმერების მხარდაჭერა, მათთვის სახელმწიფო პროგრამების გაცნობა და კონსულტაციების გაწევა.