პარლამენტმა, პირველი მოსმენით, “ზოგადი განათლების შესახებ“ კანონში ინიცირებული ცვლილები განიხილა. პროექტი, რომლის ინიციატორებიც პარლამენტის წევრები: მარიამ ჯაში, გენადი მარგველაშვილი და სიმონ ნოზაძე არიან, პლენარულ სხდომაზე გენადი მარგველაშვილმა წარადგინა.
“კანონპროექტი, მიზნად ისახავს მასწავლებლების ნდობის ამაღლებას მასწავლებლის საქმიანობის დაწყების, პროფესიული განვითარებისა და კარიერული წინსვლის სქემისადმი, მასწავლებლის პროფესიაში შესვლის გზების გამრავალფეროვნებას და მასწავლებლის პროფესიული განვითარების პროგრამების განხორციელების უფლების მოპოვების სისტემის გადახედვას“, - განაცხადა გენადი მარგველაშვილმა.
პროექტის მიხედვით, იცვლება აქამდე არსებული მასწავლებლობის მაძიებლობის ცნება და სისტემა. ახალი რედაქციით, მასწავლებლობის მაძიებელი იქნება პირი, რომელსაც აქვს სულ მცირე ეროვნული სასწავლო გეგმით გათვალისწინებული საგნის ან საგნობრივი ჯგუფის მიმართულებით ბაკალავრის აკადემიური ხარისხი ან სასპორტო პროფესიული განათლების დამადასტურებელი დოკუმენტი და ზოგადსაგანმანათლებლო დაწესებულების საჭიროებიდან გამომდინარე, დროებით დასაქმებულია ზოგადსაგანმანათლებლო დაწესებულებაში.
“პროექტით წარმოდგენილი ცვლილების შესაბამისად, მასწავლებლობის მაძიებლობა გახდება ზოგადსაგანმანათლებლო დაწესებულებაში მასწავლებლად მუშაობის დაწყების უფლების მოპოვების ერთ-ერთი გზა ახალგაზრდა და მოტივირებული მასწავლებლობის უფლების არმქონე პირებისთვის, რაც ხელს შეუწყობს ზოგადსაგანმანათლებლო დაწესებულებში მასწავლებლის დეფიციტის აღმოფხვრასა და ახალგაზრდა კადრების მოზიდვას“,- განმარტა გენადი მარგველაშვილმა.