ესტონეთის საგარეო საქმეთა მინისტრი სვენ მიქსერი მიიჩნევს, რომ „ჩრდილოეთ ნაკადი 2“ -ის გაზსადენის მშენებლობა ევროპის ინტერესებს არ პასუხობს. ამის შესახებ ესტონეთის საგარეო უწყების ხელმძღვანელმა გერმანულ გამოცემა Die Welt-სთვის მიცემულ ინტერვიუში განაცხადა.
„ამ პროექტის შეჩერება ევროკავშირის ინტერესებშია. ჩვენ უნდა ვიმუშაოთ იმაზე, რომ მომწოდებლებისა და ენერგორესურსების მოწოდების გზების დივერსიფიცირება მოვახდინოთ. „ჩრდილოეთ ნაკადი 2“ არ არის ამ მიმართულებით გადადგმული ნაბიჯი“, - განაცხადა სვენ მიქსერმა.
მისივე თქმით, „ჩრდილოეთ ნაკადი 2“ არა ეკონომიკური, არამედ გეოპოლიტიკური პროექტია.
„ეს პროექტი რუსეთისთვის ბერკეტს წარმოადგენს, რათა ევროპულ პოლიტიკაზე გავლენა მოახდინოს“, - აღნიშნა ესტონეთის საგარეო საქმეთა მინისტრმა.
„ჩრდილოეთ ნაკადი 2“ არსებული მაგისტრალური გაზსადენის „ჩრდილოეთ ნაკადის“ გაფართოების პროექტს წარმოადგენს, რომელიც რუსეთსა და გერმანიას სატრანზიტო ქვეყნების - უკრაინის, ბალარუსისა და პოლონეთის გვერდის ავლით დააკავშირებს. გაზსადენის საერთო გამტარუნარიანობა წელიწადში 55 მლრდ კბ/მ–ს შეადგენს.