ჩვენი კომიტეტი ქალთა მიმართ ძალადობის და ოჯახში ძალადობის აღმოფხვრის მიზნით, შესაბამის საკანონმდებლო ცვლილებებზე მუშაობს, - ამის შესახებ ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ განაცხადა.

სოფო კილაძის შეფასებით, მიუხედავად უკანასკნელ წლებში არაერთი წინგადადგმული ნაბიჯისა, უფლებების კუთხით ერთი-ერთ გამოწვევად დღემდე რჩება ფემიციდი, ისევე როგორც ქალთა მიმართ განხორციელებული სხვადასხვა ტიპის ძალადობა.

“აღნიშნულ საკითხებზე სასაუბროდ, პრობლემების იდენტიფიცირების მიზნით, ჩვენ ვგეგმავთ საკომიტეტო მოსმენას, სადაც ქალთა მიმართ და ოჯახში ძალადობის საკითხებზე ვიმსჯელებთ გენდერული თანასწორობის საბჭოს, სახელმწიფო უწყებების, სახალხო დამცველის ოფისის, საერთაშორისო და არასამთავრობო სექტორის წარმომადგენლებთან ერთად. ვფიქრობ, საზოგადოების სხვადასხვა ჯგუფების აზრის გაზიარება და ფართო ჩართულობა დაგვეხმარება რეფორმის წარმატებით განხორციელებაში. სწორედ ამიტომ, საკითხით დაინტერესებულ თითოეულ პირს, ვთავაზობთ საპარლამენტო ტრიბუნას ამ პრობლემებზე სასაუბროდ. ყველას ინტერესშია, შეიქმნას საჭიროების გათვალისწინებით, პრობლემების აღმოფხვრაზე ორიენტირებული საკანონმდებლო ბაზა, რომელიც უზრუნველყოფს თითოეულ ქალს გარანტირებული უფლებებით“, - აღნიშნა სოფო კილაძემ.

ინფორმაციას პარლამენტის პრესსამსახური ავრცელებს.