"საერთაშორისო გამჭვირვალობა - საქართველოს" აღმასრულებელი დირექტორი ეკა გიგაური მიიჩნევს, რომ მთავარი პროკურორის არჩევის წესი არის ხარვეზიანი და უნდა შეიცვალოს. როგორც გიგაურმა ჟურნალისტებს განუცხადა, ახალი პროკურორის არჩევა სწორედ ახალი წესით უნდა მოხდეს.

"კონკრეტულ ადამიანებზე ვერ ვისაუბრებ, რადგნ ამ პროცესში არ ვიყავით ჩართული ბევრი მიზეზის გამო. პირველი არის ის, რომ თვითონ არჩევის წესი არის ხარვეზიანი და ამაზე საუბრობდა ვენეციის კომისია. ჩვენ ვფიქრობთ, რომ ეს ხარვეზებიანი წესი უნდა შეიცვალოს და ახალი წესით უნდა დავნიშნოთ მთავარი პროკურორი იმისთვის, რომ მას უფრო მეტი ნდობა ჰქონდეს საზოგადოებისგან. მიმდინარე პროცესი წარიმართა ისევე, როგორც ბატონი შოთაძის არჩევის პროცესი. ბატონი შოთაძეც, როგორც აღმოჩნდა, არასამთავრობო ორგანიზაციების მიერ იყო წარდგენილი, თუმცა არ ვიცით რომლისგან", - განაცხადა გიგაურმა.

მისივე თქმით, შედეგებზე უნდა ვისაუბროთ მას შემდეგ, როდესაც ვინმეს დანიშნავენ.

"იმის მიხედვით, თუ ვის დანიშნავენ, მივხვდებით, რისი გაკეთება უნდა და რა აზრები აქვს პროკურატურასთან მიმართებაში მთავრობას. თუ მათ მიზნად დასახული აქვთ დამოუკიდებელი გახდეს პროკურატურა, მაშინ სხვა წესით და სხვა ადამიანი უნდა დანიშნონ. თუ არ აქვთ ეს მიზანი, მაშინ მთავრობასთან მიკერძოებულ და დაახლოებულ ადამიანს დანიშნავენ",- განაცხადა გიგაურმა.