თურქეთში მომხდარი სარკინიგზო ავარიისას დაღუპულთა და დაშავებულთა შორის საქართველოს მოქალაქეები არ არიან, - ამის შესახებ “ინტერპრესნიუსს“ საგარეო საქმეთა სამინისტროში განუცხადეს.

უწყების ცნობით, საქართველოს საკონსულო მუდმივ კონტაქტში იმყოფება შესაბამის უწყებებთან, თუმცა საქართველოს მოქალაქეების შესახებ ამ დროისთვის არანაირი ინფორმაცია არ შესულა.

შეგახსენებთ, რომ თურქეთში მომხდარი სარკინიგზო ავარიის დროს 24 ადამიანი დაიღუპა და 388 დაშავდა. ამის შესახებ პრემიერ-მინისტრის მოადგილე რეჯეფ აკდაღზე დაყრდნობით ტელეარხი CNN Türk იუწყება.

სამგზავრო მატარებელი კაფიკულე-სტამბოლის მარშრუტით მოძრაობდა. თექირდაღის პროვინციაში შემადგენლობის ნაწილი რელსებიდან გადავიდა და გადაბრუნდა. ავარიის მიზეზი გახდა ხანგრძლივი წვიმა, რომელმაც რელსები და წყალგამტარი გვირაბი დააზიანა.

CNN Türk-ის ინფორმაციით, სამაშველო-სამძებრო ოპერაცია დილის 6 საათზე დასრულდა. ყველა დაშავებული საავადმყოფოებშია გადაყვანილი, 124 მათგანი ექიმების მეთვალყურეობის ქვეშ რჩება.