მაიკ პომპეო - ვაშინგტონსა და მოსკოვს შორის ურთიერთობების გაუმჯობესების შესაძლებლობა მოსკოვზეა დამოკიდებული

აშშ-ს სახელმწიფო მდივნის მაიკ პომპეოს განცხადებით, ვაშინგტონსა და მოსკოვს შორის ურთიერთობების გაუმჯობესების შესაძლებლობა მოსკოვზეა დამოკიდებული. ამის შესახებ მაიკ პომპეომ „ტვიტერის“ საკუთარ გვერდზე დაწერა.

„დღეს აშშ-ს პრეზიდენტი და მე ჩვენს რუს კოლეგებს ჰელსინკიში შევხვდებით. რუსეთის მთავრობასთან ურთიერთობების გაუმჯობესება ყველას წაადგება, მაგრამ ბურთი რუსეთის მოედნის ნახევარზეა“, - განაცხადა აშშ-ს სახელმწიფო მდივანმა.

მან ასევე აღნიშნა, რომ „აშშ განაგრძობს რუსეთისთვის პასუხისმგებლობის დაკისრებას მავნე საქმიანობისთვის“.

აშშ-სა და რუსეთის პრეზიდენტების შეხვედრა დღეს ფინეთის დედაქალაქ ჰელსინკიში გაიმართება. აღსანიშნავია, რომ დონალდ ტრამპისა და ვლადიმერ პუტინის პირველი პირისპირ შეხვედრა 2017 წლის 7 ივლისს „დიდი ოცეულის“ სამიტის ფარგლებში შედგა, რომელიც ჰამბურგში გაიმართა.