მსოფლიო ჩემპიონატის ფინალში საფრანგეთის ნაკრების გამარჯვებასთან დაკავშირებით, პარიზის სატრანსპორტო სამმართველომ ექვს მეტროსადგურს დროებით სახელი შეუცვალა. ამის შესახებ ნათქვამია პარიზის სატრანსპორტო სამსახურის განცხადებაში.
მეტროსადგურების სახელის დროებითი შეცვლა სიტყვების თამაშს ეფუძნება. კერძოდ, მეტროსადგურ Victor Hugo-ს დროებით დაერქვა Victor Hugo Lloris საფრანგეთის ნაკრების მეკარის უგო ლორისის საპატივსაცემოდ. მეტროსადგურ Сhamps-Elysees – Clemenceau-ს სახელი გადაერქვა და Deschamps Elysees – Clemenceau ეწოდა, საფრანგეთის ნაკრების მთავარი მწვრთნელის დიდიე დეშამის საპატივსაცემოდ.
დღეს ელიზეს სასახლეში საფრანგეთის ნაკრებს საფრანგეთის პრეზიდენტი ემანუელ მაკრონი მიიღებს.
გუშინ საფრანგეთის ნაკრებმა ფეხბურთის მსოფლიო ჩემპიონატის ფინალში ხორვატიის ნაკრები ანგარიშით 4-2 დაამარცხა და ორგზის მსოფლიო ჩემპიონი გახდა.