საქართველოს ოკუპირებული ტერიტორიებიდან გადაადგილებულ პირთა, ლტოლვილთა და განსახლების სამინისტროს შენობა სავარაუდოდ არ გამოთავისუფლდება, - ამის შესახებ საქართველოს ოკუპირებული ტერიტორიებიდან დევნილთა, შრომის, ჯანმრთელობის და სოციალური დაცვის მინისტრმა დავით სერგეენკომ ჟურნალისტებს განუცხადა.

როგორც სერგეენკომ აღნიშნა, სამინისტროების სტრუქტურის შერწყმის შემდეგ, მოქალაქეთა მიღება ამავე შენობაში გაგრძელდება.

„პირველ ეტაპზე, რომელიც უკვე დაიწყო და 3 თვე გაგრძელდება, ორივე სამინისტროს სტრუქტურა ტექნიკურად გაერთიანდება, გარდა იმ ნაწილის, რაც სხვა სამინისტროებში გადადის. უდიდესი ნაწილი ადამიანური რესურსების, ტექნიკური აღჭურვილობის რჩება გაერთიანულ სტრუქტურაში. შესაბამისად, რჩება ის შენობაც და გააგრძელებს ფუნქციონირებას, სადაც ახლა დევნილთა სამინისტროა. 3 თვის განმავლობაში მოხდება ახალი სტრუქტურის დამუშავება და დახვეწა. ახლა გამიჭირდება იმის თქმა, გამოთავისუფლდება თუ არა შენობა. ვფიქრობ, რომ - არა, რადგან მოქალაქეთა მიღება აქამდე არსებულ ორივე სამინისტროს ძალიან მაღალი ჰქონდა და დარჩება ძალიან მაღალი. ამიტომ ვფიქრობ, რომ ამ შენობის რესურსი მომავალშიც საჭირო იქნება",- განაცხადა სერგეენკომ.