გიორგი მარგველაშვილი - არ უნდა დაემსგავსოს ეს პროცესი იმ საქმეებს, რომელიც გვახსოვს, იგივე ტრაქტორების საქმე და კაბელების საქმე

არ უნდა დაემსგავსო ეს პროცესი იმ საქმეებს, რომელიც გვახსოვს, იგივე ტრაქტორების საქმე და იგივე კაბელების საქმე, - ამის შესახებ პრეზიდენტმა გიორგი მარგველაშვილმა რეგიონული განვითარებისა და ინფრასტრუქტურის და ეკონომიკისა და მდგრადი განვითარების ყოფილი მინისტრების პროკურატურაში გამოკითხვის თაობაზე დასმული კითხვის საპასუხოდ განაცხადა. როგორც პრეზიდენტმა აღნიშნა, მას ამ ეტაპზე გაუჭირდება იმაზე საუბარი, არის თუ არა ეს პროცესები ყოფილი პრემიერის გიორგი კვირიკაშვილისა და მისი კადრების წინააღმდეგ დევნა.

„კონკრეტულად არ ვიცი რის გამო ხდება გამოკითხვა ან არის თუ არა დევნის პროცესი დაწყებული. თუმცა მიმაჩნია, რომ მთავარი შემადგენელი არის ამ პროცესში ის, რომ პროცესები უნდა მიმდინარეობდეს რაც შეიძლება გამჭვირვალედ და საზოგადოებას არ დარჩეს კითხვები. საზოგადოებას აქვს კონკრეტული კითხვები იმასთან მიმართებაში - რანაირად ფორმირდება ხელისუფლების ვექტორები და ძირითადი ორიენტაციები. მე არაერთხელ მითქვამს და ბატონი კვირიკაშვილის გადადგომის პირველივე დღეს აღვნიშნე, რომ არ შეიძლება საქართველოში პრემიერ-მინისტრები უცებ, უარგუმენტოდ ქრებოდნენ პოლიტიკური პროცესებიდან. ეს კითხვა გაგრძელდა აჭარასთან მიმართებითაც, როდესაც ბატონმა პატარაძემ მადლობა გადაუხადა პარტიას და წავიდა თანამდებობიდან. ეს კითხვა მაქვს მე და შესაბამისად, ნებისმიერი პროცესი, რომელიც ამას მოყვება უმნიშვნელოვანესია, რომ იყოს უფრო მეტად გამჭვირვალე, არ უნდა დაემსგავსოს ეს პროცესი იმ საქმეებს, რომელიც ამ მიმართებაში გვახსოვს. ეს არ უნდა იყოს ტრაქტორების საქმე, ეს არ უნდა იყოს კაბელების საქმე. საზოგადოებას მაღალი ინტერესიდან გამომდინარე უნდა მიეცეს მაქსიმალური ინფორმაცია ამ მიმართულებით“, - განაცხადა გიორგი მარგველაშვილმა.

პროკურატურის ინფორმაციით, ზურაბ ალავიძე და დიმიტრი ქუმსიშვილი გამოკითხვაზე იმყოფებოდნენ. როგორც მთავარ პროკურატურაში აცხადებენ, მთავარი პროკურატურის საგამოძიებო ნაწილში მიმდინარეობს გამოძიება საქართველოს ეკონომიკისა და მდგრადი განვითარების სამინისტროს, ასევე რეგიონული განვითარებისა და ინფრასტრუქტურის სამინისტროს ცალკეულ მოხელეთა მიერ სამსახურებრივი უფლებამოსილების ბოროტად გამოყენებისა და დიდი ოდენობით საბიუჯეტო თანხების მართლსაწინააღმდეგოდ მითვისება/გაფლანგვის ფაქტებზე.

“ხსენებული სისხლის სამართლის საქმის გამოძიების ფარგლებში საქართველოს მთავარ პროკურატურაში გამოიკითხნენ ეკონომიკისა და მდგრადი განვითარების ყოფილი მინისტრი დიმიტრი ქუმსიშვილი და რეგიონული განვითარებისა და ინფრასტრუქტურის ყოფილი მინისტრი ზურაბ ალავიძე. საქმეზე გრძელდება გამოძიება და შედეგების შესახებ დამატებით ეცნობება საზოგადოებას“, - აცხადებენ პროკურატურაში.

რამაზ საყვარელიძე - პროპორციული საარჩევნო სისტემა კიდევ უფრო მარცხიანს გახდის ოპოზიციის მდგომარეობას
ქართული პრესის მიმოხილვა 05.06.2020
თედო ჯაფარიძე - არ მგონია, რომ ამერიკის "დასუსტებით" რუსეთმა ან რომელიმე სხვა ქვეყანამ საკუთარი პოზიციები გაიმაგროს
მითები და რეალობა ჰესების შესახებ
გიორგი რამიშვილის პრესსამსახური განცხადებას ავრცელებს
ლიბერთის მობაილ ბანკით სარგებლობა უკვე მობილური ინტერნეტის გარეშეც შესაძლებელია
ფინკა ბანკისა და სიმბიოტიკსის თანამშრომლობა მეწარმეების დაკრედიტების მიმართულებით გრძელდება
„ვისოლში“ საწვავზე წლის მიმდინარე პერიოდში რეკორდულად დაბალი ფასები დაფიქსირდა