თურქეთში ორი წლის წინ შემოღებული საგანგებო მდგომარეობა ოფიციალურად გაუქმდა. ამის შესახებ თურქული საინფორმაციო სააგენტო „ანადოლუ“ იუწყება.

თურქეთში საგანგებო მდგომარეობა 2016 წლის 21 ივლისს, მას შემდეგ შემოიღეს, რაც აღკვეთილი იყო სახელმწიფო გადატრიალების მცდელობა.

ამ დროის მანძილზე, საგანგებო მდგომარეობა შვიდჯერ გახანგრძლივდა.

საგანგებო რეჟიმის მოქმედების პერიოდში თურქეთის ხელისუფლებამ 35-ზე მეტი განკარგულება გამოსცა, რამაც საშუალება მისცა 130 ათასი ჩინოვნიკი, იურისტი, აკადემიკოსი, მასწავლებელი და ძალოვანი სტრუქტურების თანამშრომლები დაეთხოვათ.

აღსანიშნავია, რომ ევროკავშირის რიგი წევრი ქვეყანა და თურქეთის ოპოზიცია ხელისუფლებას საგანგებო მდგომარეობის გამო აკრიტიკებდა.