ყურადღებით ვაკვირდებოდი და კრიტიკულ სიტუაციაში როდესაც ვნახე, რომ გარედან ჩემი კონტროლით საკმარისი არ იყო რესურსი იმისა, რომ გუნდი შენარჩუნებულიყო, პოლიტიკაში დავბრუნდი, - ამის შესახებ საქართველოს ყოფილმა პრემიერ მინისტრმა და ამჟამად პარტია „ქართული ოცნება-დემოკრატიული საქართველოს“ თავმჯდომარემ, ბიძინა ივანიშვილმა პოლიტიკაში დაბრუნების შესახებ მიზეზების განმარტებისას საზოგადოებრივი მაუწყებლის ეთერში განაცხადა.

ბიძინა ივანიშვილმა რამდენიმე მიზეზი ჩამოთვალა, თუ რატომ დაბრუნდა პოლიტიკაში, მათ შორის დაასახელა გუნდის დაშლის რეალური საფრთხე. „მესამე მიზეზი, რაც დავასახელე ყრილობაზე არის ის, რომ გუნდში შეიმჩნეოდა, რომ თითქოს დაკარგული იყო გუნდურობა და იყო ეჭვი, რომ გუნდი დაშლილიყო.

თუ მსუბუქი მინიშნება გავაკეთე ამაზე ყრილობაზე, ახლა ვიტყვი, რომ ძალიან დიდი იყო ხიფათი, რომ გუნდი დაშლილიყო. მე ამას ყურადღებით ვაკვირდებოდი და კრიტიკულ სიტუაციაში როდესაც ვნახე, რომ გარედან ჩემი კონტროლით საკმარისი არ იყო რესურსი იმისა, რომ გუნდი შენარჩუნებულიყო, დავბრუნდი პოლიტიკაში. მე კიდევ მექნება შესაძლებლობა ამ ყველაფერს დავუბრუნდე და ვაჩვენო საზოგადოებას. გუნდში უფრო ღრმად იყო პრობლემები“, - განაცხადა ივანიშვილმა.