ვთვლი, რომ გასაკვირი არ უნდა იყოს ბიძინა ივანიშვილის მხრიდან მაღალი პასუხისმგებლობის გრძნობა და ანგარიშვალდებულება საზოგადოების მიმართ, - ასე გამოეხმაურა „ქართული ოცნების“ დეპუტატი, საგარეო ურთიერთობათა კომიტეტის თავმჯდომარე სოფიო ქაცარავა ბიძინა ივანიშვილის გუშინდელ ინტერვიუს.

„ჩემთვის ყველაზე მნიშვნელოვანი გზავნილები და სწორი შეფასება: პარლამენტის როლის ხაზგასმა: პარლამენტის ფუნქცია უნდა გაიზარდოს და გამყარდეს, საბოლოოდ ჩამოვყალიბდეთ ძლიერ საპარლამენტო მმართველობად; ასევე, ძალიან სწორი შეფასება საგარეო პოლიტიკის მიმართულებით მიღწეულ პროგრესსა და გამოწვევებზე; გლობალური გამოწვევების ფონზე, ჩვენ უნდა ვიყოთ ადეკვატურები და ვიმოქმედოთ სწორად, ისე, რომ ქვეყნის მიერ მიღწეული საგარეო თუ საშინაო წარმატებები, კიდევ უფრო გავაძლიეროთ“, -განაცხადა სოფიო ქაცარავამ.

მისივე თქმით, დარწმუნებულია, რომ ბიძინა ივანიშვილის პოლიტიკაში დაბრუნება ძალიან დიდ პოზიტიურ გავლენას იქონიებს, როგორც პოლიტიკური პროცესის ჯანსაღ განვითარებაზე, ასევე დემოკრატიის ხარისხის გაუმჯობესებაში.