მაიკ პომპეო - ირანისთვის დაწესებული სანქციები განუხრელად იქნება შესრულებული
ირანისთვის დაწესებული სანქციები განუხრელად იქნება შესრულებული, - ამის შესახებ აშშ-ს სახელმწიფო მდივანმა მაიკ პომპეომ განაცხადა.
მისი თქმით, აშშ ამ სანქციების შესრულების უზრუნველყოფას გეგმავს.
კითხვას, შეძლებს თუ არა თეირანი თავიდან აიცილოს აკრძალვა ფინანსურ ოპერაციებზე და ნავთობის გაყიდვაზე, აშშ-ს სახელმწიფო მდივანმა უპასუხა, რომ ირანი ამ კუთხით წარმატებას ვერ მიაღწევს.
„ეს სანქციები ირანის დესტრუქციული საქმიანობის წინააღმდეგ ჩვენი ბრძოლის ძალისხმევის მნიშვნელოვანი ნაწილია“, - აღნიშნა სახელმწიფო მდივანმა.
მაიკ პომპეომ განმარტა, რომ მხოლოდ ირანის მიერ თავისი პოლიტიკის შეცვლა შესაძლებელს გახდის სასანქციო რეჟიმის შესუსტებას. თუმცა, სახელმწიფო მდივანს არ დაუკონკრეტებია რა ნაბიჯები უნდა გადადგას თეირანმა.
„ვიმედოვნებ, რომ თეირანი შეცვლის თავის პოლიტიკას და ვაშინგტონთან განიხილავს ისეთ საკითხებს, როგორიც არის ბალისტიკური რაკეტების გამოცდა და რეგიონში შეიარაღებული დაჯგუფებებისთვის მხარდაჭერის გაწევა. თუმცა, დღეს იმის არავითარი ნიშანი არ არის, რომ ირანი შეცვლის თავის პოლიტიკას“, - დასძინა მაიკ პომპეომ.
