თამარ ჟვანია - არასერიოზული და არაპროფესიონალურია, როდესაც საია-ს ცალკეული წარმომადგენელი დაკავებულია ნათესაური კავშირების დადგენით

არასერიოზული და არაპროფესიონალურია, როდესაც საია-ს ცალკეული წარმომადგენელი დაკავებულია ნათესაური კავშირების დადგენით, ნაცვლად იმისა, რომ დააკვირდნენ ამ ადამიანების საარჩევნო საქმიანობას, - ამის შესახებ ცესკო-ს თავმჯდომარე თამარ ჟვანიამ საია-ს მიერ გამოქვეყნებული ანგარიშის კომენტირებისას განაცხადა.

მისივე თქმით, არასამთავრობო ორგანიზაციის მთავარი ფუნქცია უნდა იყოს საარჩევნო საქმიანობის მონიტორინგი და არა ნათესაური კავშირების დადგენა.

„საარჩევნო ადმინისტრაცია ირჩევს ადამიანებს პროფესიული ნიშნით. ეს ადამიანები წლების განმავლობაში მუშაობდნენ, აქვთ ძალიან დიდი გამოცდილება და ჩვენ არ ვართ დაკავებული ნათესაური კავშირების დადგენით,“ - განაცხადა თამარ ჟვანიამ.

საია-ს ინფორმაციით, საოლქო და საუბნო საარჩევნო კომისიების დაკომპლექტების მონიტორინგის ფარგლებში, ცესკო-ს მიერ მიერ შერჩეული 73 დროებითი წევრიდან 5 შემთხვევაში გამოიკვეთა შერჩეული პირების „ქართული ოცნების“ აქტივისტობა/მხარდაჭერა, ხოლო 6 შემთხვევაში არჩეული პირების ცესკო-სა და სუს-ის მაღალი თანამდებობის პირებთან ოჯახის წევრობა/ნათესაური/მეგობრული კავშირები.