აჭარის ავტონომიური რესპუბლიკის უმაღლესი საბჭოს განათლების, მეცნიერების, კულტურისა და სპორტის საკითხთა კომიტეტის თავმჯდომარე ლადო მგალობლიშვილი,ცნობილი ქართველი პიანისტის ელისო ბოლქვაძის მიწვევით, მუსიკალური ფესტივალის - BATUMI MUSICFEST-ის „Welcome კოქტეილს“ დაესწრო.

როგორც „ინტერპრესნიუსს“ აჭარის უმაღლესი საბჭოს პრესსამსახურიდან აცნობეს, ბათუმის საერთაშორისო მუსიკალური ფესტივალი, რომელიც თითქმის 10 დღეს გაგრძელდება, იუნესკოს მაღალი პატრონაჟით მიმდინარეობს და წელს განსაკუთრებული მრავალფეროვნებით გამოირჩევა.

ლადო მგალობლიშვილმა თავის მისასალმებელ სიტყვაში ფესტივალის მნიშვნელობაზე ისაუბრა.

მისი განცხადებით, BATUMI MUSICFEST-ი ბათუმის ერთ-ერთ გამორჩეულ სავიზიტო ბარათად იქცა და ამაში უდიდესი წვლილი იუნესკოს მშვიდობის არტისტსა და ქართველ პიანისტს ელისო ბოლქვაძეს მიუძღვის.

„ფესტივალი ახალგაზრდა და საერთაშორისო მნიშვნელობის არტისტების ერთ პლატფორმაში გაერთიანებით და თანამედროვე ინოვაციური ტექნოლოგიების განათლების კომპონენტის თანხლებით - ბათუმის უმნიშვნელოვანესი სახელოვნებო რესურსების განვითარებისა და საერთაშორისო ასპარეზზე წარდგენის ერთ-ერთი საუკეთესო გზაა“, - ნათქვამია უმაღლესი საბჭოს პრესსამსახურის ინფორმაციაში.