„ევროპული საქართველოს“ პრეზიდენტობის კანდიდატი დავით ბაქრაძე ვაშინგტონში, ეროვნულ კათედრალში სენატორ ჯონ მაკკეინის პანაშვიდს დაესწრო.
დავით ბაქრაძის თქმით, საქართველო, კონგრესსა და სენატში ერთ-ერთი ყველაზე დიდი მხარდამჭერი დაკარგა.
„დღეს საქართველომ დაკარგა პოლიტიკურად ძალიან დიდი მეგობარი. ჩვენ დავკარგეთ კონგრესში და სენატში ჩვენი ერთ-ერთი ყველაზე დიდი მხარდამჭერი და არ არსებობდა არც ერთი წელი, როდესაც საუბარი არ იყო თავდაცვის დახმარებაზე, როდესაც საუბარი არ იყო საქართველოს უსაფრთხოებაზე. არ ყოფილა არც ერთი წელი, რომ კონგრესს ისე მიეღო თავდაცვის აქტები, რომ ჯონ მაკკეინს არ მოეთხოვა ცვლილებების შეტანა და საქართველოსთვის დახმარების გაზრდა. ბუნებრივია, რომ ეს არის ძალიან დიდი დანაკლისი პოლიტიკური, ადამიანური, მორალურიც. ჩვენ ვალდებულნი ვართ, სამწუხაროდ მცირე დელეგაციით, აქ ვიყოთ და კიდევ ერთხელ გამოვხატოთ მადლიერება სენატორ მაკკეინის მიმართ“,- დავით ბაქრაძე.
სენატორ ჯონ მაკკეინს დღეს კრძალავენ.